Häsin am Schtrand

Für Rubén

Summer – träume vom Schtrand.
Illusione uf Inschtagram, romantischi Sunneungergäng, bruun brönnti Bei, e Hang mit em ne trendi Drink.
Ume lige, ir Sunne brote, nid a Huutchräbs dänke, nüt mache, dr Autag hinger sech lo – Ferie.
Schtrandtag – aus erschts Sunnegreme; d’Huut chläbt.
Dr einsam Troumschtrand verschwindet zwüsche de Lüüt, wie Seehüng lige si do – es all juu kän iit Büffee für Kanibale.
Gofe purzle i de Wäue ume, kreische, boue Sangburge, grabe ihri Öutere y, schpile mit ufblosbarem Plastigzüg i aune Farbe u Forme, Eihörner, Lamas, Flamingos u weiss dr Gugger was no.
Derzwüsche posiere Schtrandschönheite fürs nöchschte Inschtabüud – Schyn statt sy.

E einsame Flip Flop tanzt i de Wäue.
Sang – Sang a de Füess uf em Schtrandtüechli, Sang chläbt ar Sunnegreme.
D’Sunne schynt häu, ke Schatte; d’Sunnebrüue rütscht vor Nase, es isch heiss.
D’Syte im ufgschlagnige Buech bländet, Sang knirscht derzwüsche.
Im Notizbuech, Sang u Sunnegremefläcke.
Verschmierti Buechschtabe – Gedanke verschwümme, trybe ufs Meer, chöme ir Brandig zrugg.
Am Schtrand, Schtrandhändler, pryse Batiktüechli aa, büuigi Sunnebrüue, Schmuck us Plastigperle. Angeri chöme mit Kokosnüss oder biete e Massaasch aa – Öu vermischt sech mit Sunnegreme uf dr Huut.

Schtrandguet; zwüsche de Muschle ligt Plastig, e Wouschtangsgolasche us Ghüdder. Me erchennt zum Töu gar nüm, was es isch gsi – Zivilisationsdräck, verlore u verschwindet doch nüm.
Mängisch chöme Künschtler, sammle ’s uf, mache Kunscht drus; Mahnmau für i d’Galeriie.
Früecher si villech mou Schätz aagschwemmt worde, we irgendwo es Handusschiff kenteret isch.
Jetz chunnt Plastig und Öu – zwüsche de Quaue wird s’Meer läär.

Wale schtrande, dr Lärm trybt se us de Meer.
No hüfiger schtrande Mönsche, si sueche kes Paradiis, aber es bessers Läbe.
Mir erfinge nöii Gränze, mache d’Ouge zue – Angscht?
Ig schtyge i Flüger, zäme mit dr Idee vom ne Paradiis im Chopf, finge ‘s aber glych nid – d’Seifeblottere platzt.
Es git kes Paradiis, säute isch es dört, wo me grad isch.
Es hingerlot es Loch, wo mir mit Sehnsucht uffüue – Föteli uf Inschtagram.